Aviadi, stu patrune, 'nu palazzu
Cumu 'na meraviglia ppe bellizza.
Portava nnu signale a nnnu vrazzu
Ca 'u patre l'ammazzaru intra 'na lizza!
E quannu caminavad' a ra chjazza
Ogn'unu le usava gentilizza,
E, ppe bastune, usavadi 'na mazza
Mustrannu. ccu ra forza, la "grannizza"! ...
Li ricchi, ognunu sa, sunu 'na razza
Ch ppe nessunu mustra tenerizza.
Ognunu ppe ru riccu, va e s'ammazza
Ca cride c'hadi fattu 'na prodizza...
Lu gelunaru, ru, ppe nu "piezzu"
S'ha ruttu schina, piedi, gamme e bbrazza
E aru liettu sue, ha ppe ccapizzu
'Na massa cummegliata - 'na timpazza...
- Mo nun me fidu cchiù pemmu "m'ammazzu"
Ppe ttie. Iu su' chjinu de sporchizza
Mentre chi tuni stai intr'u palazzu,
Ed iu, 'na turra chjina de munnizza!...
Si tu vue fare "u riccu" usa 'e vrazza
Cumu zappavi iu - de picciulizza -
Invece mu a re mani puorti 'a mazza,
Allordale 'e sudure e dde stanchizza!...
vrazzu: braccio gelunaru: colono sporchizza: sporcizia
monnizza : mondezza
Allordale: sporcale
Nessun commento:
Posta un commento