De stu munnu le cose cchiù belle
Sunu 4 si cridi o nun cridi.
Si cce cridi te dicu le "stelle"
Chi cchiù lucenu e, quasi, le bbidi.
La cchiù bbona de tutte è SALUTE;
senza 'e chista lu riestu 'u' dd'è nnente:
- Me l'hau dittu persune volute,
Ed iu vuogliu mu lu tieni 'mmente.
La "sicunna", cchiù bella è ra DONNA;
Senza chista nessunu è a ru munnu!
Nun cc'è unu chi 'e notte nun sonna,
E, sinnò, si te suonni 'u' dd'è ssuonnu!
?Nquantu 'a terza, edi bella daveru;
Sulu 'a donna avimu chi 'a passa.
u scommettu, e cchistu lu speru
Ca, ccu mmie, aju tutta la "massa"!
Sunu i JURI, ca tutti lu sau;
Cchi culuri; ch'adduru olezzante;
Cchi bellizza e bbiduta chi fau,
Mo iu criju ca chistu è bastante...
Ppe ru riestu, 'a quarta è DINARU;
Senza 'e chistu tu sii disperatu.
Chista rrobba è chi fadi l'avaru!
Tuttu 'u riestu è nu trunzu gelatu!...
note:
lucenu : brillano adduru: odore trunzu: torsolo
Nessun commento:
Posta un commento