'Nu juornu nu mastinu se frugau
Mu muzica nu gattu chi dormia.
Cridiennu ca ccu sulu chi latrau
Lu gattu se spagnava e sinne jia.
Invece mu lu gattu s' 'a scappava,
Ccu re zampe, lu cane rascau tuttu
E, latrannu chillu cane sanguinava
De li rascuni chi le fice 'u gattu.
Lu gattu mai se spagna de lu cane.
Perciò, lassa mu dorme a nnu cantune.
'U gattu nun abbaia o circa pane;
Lu cane latra sempre ed è mangiune.
Ma tu te cridi ca lu gattu è miegliu
De lu mastinu cane farabuttu.
Lu cane ad ogni scrusciu è rivigliu;
Sulu li surici risbiglianu lu gattu.
- Na vota, lu guinzagliu rascinannu
Nu cane, jiadi appriessu a ra patruna
Chi, se girau e ddisse -ccu cumannu-
-Acchiapa lu guinzagliu, e me lu duna!
- 'U cane lu pigliau e ru projiu
A ra patruna, e lestu, lu pigliau
E versu 'a casa illu proseguiu:
... A mie meravigliatu me lassau!...
Dante Raso
Nessun commento:
Posta un commento