Quannu unu è viecchiu

 Quannu unu è viecchiu nullu 'u po vidire;

mancu lu propriu figliu ch'ha crisciutu.

 Si 'nu bicchieri d'acqua vodi avire, 

  chistu fa finta ca nun l'ha sentutu.

 si se lamenta c'hadi 'nu dulure

dice ma chi hai? Duve te gnure?

 Quannu unu è viecchiu e nun po caminare

 ha pe m'usa grucce, si vo jire

ha voglia mu se sporza de gridare

 si la famiglia sua 'u  vo sentire.

 pare ca i figli 'un lu sanu

ca u patre s'è acciuncatu fatigannu...

 Quannu unu è viecchiu circa mu fa signu

ca vo jire a ru liettu ppe curcare

Lu figliu l'ha capitu, ma ppe 'mpignu,

grida, arrabbiatu: ma 'un me siccare.

lu viecchiu circa  ppemu fa capire

ca sulu titi aiutu vodi avire...

 Quannu unu è viecchiu vorria riposare;

ma la famiglia pare fatta apposta

mu fa baccanu cchiù ca nne po fare,

 e 'nu minutu sulu mai nun sosta.

Lu patre 'un po parrare o caminare

mancu nullu retta le vo dare.

 Quannu unu s'è mmecchiatu puzza a tutti,

 e chistu  lu sau tutti e sunu fatti.

 'Ncappacitatu, passa juorni brutti; 

Si tu cce piensi cc'è de nescire matti

E ra famiglia tutta ha fattu vutu

mu 'u patre scatta e crepa 'ntra u tavutu.

 Dante Raso