CATINI
Di quandu sì ppartùta,
tìagnu 'na pena, Catiri', intr''o cori:
'na pena randi! Pìansic'accussì
s'ha ddi sintìri, Catiri', chi' mòri!
Ti 'ndi ricùardi quandu...
iu ti guardava ddintra l'ùacchji chjàri
o ti tinìa lla manu dintra 'i manu...!?
Oh, 'sti ricùardi, mo', cumu sù amari!
Chi sa cchjù quantu voti
sùgnu turnàtu, Catiri', allu puzzu
duvi tu m' aspittàvi ogni mmatina,
all'impìadi, vicinu 'u cancilluzzu...?!
'U puzzu è ancora chjùsu
e dduvi 'a strata fha lla giravota
c'è ancora 'a petra dduvi t'assittàsti
ciangìandu, Catiri', l'ùrtima vota...
Ed è rristàtu apìartu
'u cancilluzzu, cumu tu 'u lassàsti
quandu l'ùrtima vota, di luntanu,
ciangìandu, Catiri', mi salutàsti...
Ed è rristàta aperta
d' 'a casa 'na pirsiana chi mo' vàtti,
chi jòca ccu' llu viantu jùarnu e nnotti:
si ràpiri. ..si chjùdi. ..e sbàtti, sbàtti...
Pirchì, pirchì nun tùarni
a 'sta casa ch'è cchjùsa e cchi t'aspètta?!
'U rampicanti sta mintìandu 'u juri,
'u gridu cchjù 'un si sènti dd' 'a civetta...
e ddavant' 'u purtuni
puru 'u cani t'aspètta, Ccatiri'...,
'u cani d' 'u colonu: t' 'u ricùardi?
Pirchì nun tùarni, dìcimi, pirchì...?
'Stu cancilluzzu apìartu
mo' pàri ca mi dici: «Tòrna, tòrna...»,
mo' pàri ca mi dici: «'Un tòrna cchjù...».
Pàssa llu jùarnu, 'a notti; scùra, 'nghjòrna...
ed iu aspìattu... t'aspìattu!
Iu ti vulèra, Ccatiri', 'na cosa,
'na cosa sula ancora dumandari:
-Pò mmai campàri, senza suli, 'a rosa...?
Alla spiranza 'u cori
si ràpiri, si chjùdi... e bbàtti... vàtti:
cumu allu viantu 'a pirsìana tua. ..
chi si chjùdi, si ràpiri...e cchi sbàtti
Nessun commento:
Posta un commento