'A lingua de' patri

'A lingua de' patri      

di  Benito Castagna 

Catanzaro

 Cchi belli i moderni!... Buttuni... robbò...
'gnoranti nde sunnu, ma pochi, però!
 Cu' parra tri lingui cu' emigra luntanu,
nuiatri, stentandu, parramu italianu,
e  'a lingua de' patri, de' vecchi antenati,
n'a parra  cchiù nuddu, n'a senti nt'e strati!

Curiusu 'e natura mi vinna  'a gulia...
fu comu a 'na vota 'na specie  e paccìa;
mi misi 'ma giru putìchi putìchi
passandu n'te strati, trasendu 'n'te vichi
e vozi  'ma sacciu, facendu 'nu giru,
si fùru poi tanti cchi mi capisciru;
parrandu in dialettu, 'ma cercu 'ma sacciu
e forsi cchiù  'e 'ncunu pensau ch'eru pacciu!
Trasìvi  derittu 'nt'a prima putica
parrandu de prescia, e senza 'na chijca:
Mi serva 'na grasta, m'è randa, però,
ch'e'   pp'o petrusinu cc'u  vasilicò...
'Na  vozza de crita  'ma l'inchiu 'a matina,
e setta, otto gugghi... e 'na scupettina,
n'agghiombaru 'e spacu, 'nu tirabusciò,
manteca, poi bàttari..e... basta ppe' mò!
Ccu 'a faccia "arremisa" mi guarda 'u patruna
e poi mi respunda d'arret'u bancuna:
" Parlate davvero ? O forse scherzate?
Io nulla ho capito di quel che cercate! "
..Restavi 'ntrassatu, 'e marmuru, e' gessu
mandandu refrischi a chistu progressu!!
Mintimuni 'e prescia, 'nt'e casi, nt'e scoli
dicìmu a li patri, ccu mammi e figlioli:
"A mamma d'a lingua vernàculu è
e n'atra cchiu megghiu, daveru, non c'è!
Cchiù sèessu 'u dialettu l'avimu'esentira
ca 'a lingua de' patri non s'a de perdiri