Ognunu sa chin'edi chista strega;
è 'n'aggelluzzu vacabunnu assai.
Fa l'ova e, dopu, nun fallisce mai;
'e fa cuvare a l'autri, e sinne frega...
Avimu, tra nue autri, tanta gente
chi fau cumu 'u cuculu veramente.
Canusciu, iu, n'amica scustumata
che quannu ha site dice a ra vicina:
. Avissivu acqua frisca stamatina
Ca 'a mia, s'è tutta quanta quadijata?
Se 'ncrisce pemmu vadi a ra funtana
Ppecchì è na vacabunna ed è 'na scarana...
Canusciu, de ssa gente, 'na varcata
chi quasi su' lu stessu d' 'u cuculu,
Ma iu , tra tanti, criju sugnu sulu
Ca le canusciu priestu; a 'na guardata.
Ppe nummu me dilungu cca finisciu
Ca veramente iu puru me RINCRISCIU...
Dante Raso
Nessun commento:
Posta un commento