'u casciune edi na cascia granne assai
ed hai d'avire puza de gigante
Mu azi la chiudenna, quannu vai
Mu pigli, o mu cce minti, s'è bacante.
Iu me ricuardu, quannu lu chiudiamu,
Sbattia chi tu sentie 'na cannunata.
Stipatu tuttucose cce teniamu:
Mustazzuoli de mele, 'na furnata.
Nuci, castagne; assai ficu siccate
Surache e ri turduni ppe 'mpilare;
Capicolla, prisutti e ssuppressate
E casu tuostu, buonu ppe grattare...
Lu granu, lu nnianu; cose duce
Ppe Natale, o ppe ghjuorni ricordati;
Le ficu chjne 'e nuci - mise a cruce -
Spizzicaturi, buoni ppe malati...
Dante Raso
Nessun commento:
Posta un commento