' Na pignata vicinu a ru fuocu,
Ccu ssurache de intra, cocia
'Ntieri 'a vampa ch'ha fattu lu cuocu;
A ra rasa, 'na gatta dormia.
Supra lu tribbitu 'nu quadariellu
chi stufava 'a carne d'agniellu.
'Nu granne furnu ppe' cce 'mpurnare
'U pane ch'era dintra 'a majilla.
Cce voze assai ppe ru potire "fare"
Ca, a levatina, era n'ugnilla.
Ma mo ch'è fattu nue lu scanamu
pue 'u 'mpurnamu e nn'u mangiamu.
Cchiù chiravia c'era n'armigiu
E, supra chistu, cc'è ru varrile
Chi ha ri circhi pittati grigiu
Cumu la porta de lu porcile.
Intr 'u varrile acqua 'e Trazzinu
Ppe tutti i figli; ppe Tata: Vinu!
Tri o quattru seggie mise a ra destra;
- Tutte 'mpagliate ccu bbudda fina.
Una stavia 'ntieri a ra finestra
E, l'autre tri, intra 'a cucina,
Supra i tijilli li ceramili
Chi ogned'unu pisa ddui chili...
L'astracu edi mattune russu
Chi l'adi fattu lu Tata miu.
Nun c'edi nente veru de lussu
Ca tantu n'adi mannatu Diu.
Mo, tata è muortu, illa nun cc'e nullu,
Percù me fiermu e mintu lu " BULLU" !
Dante Raso
Nessun commento:
Posta un commento