u paisi miu (dialetto nicastrese)

‘U paisi miu

Si ppi luangu e ppi largu giru ‘u mundu,
ppi quantu illu è randi e quantu è tundu,
‘un c’ è paisi ca di cchjù m’ attira,
cumu Nicastru,speciarmenti ‘a sira,
quandu s’ appizzanu ‘i luci ad una ad una
ed ucchjulia du ‘u cialu puru ‘a luna.

‘U corzu e llu viali da ‘a stazioni
si linchjinu di randi e di guagghjuni.
S’ incuntranu,si parranu ppi via.
“Cumu staviti?” “Iu bona,e bua cummari mia?”
I mariti,i fhigghji,’a scola,
‘u lavoru,’a misata e intantu vola
chistu tiampu tirannu c’ha passatu,
ma resta llu ricordu di cchi è statu.
Caru paisi,ti vuagghju tantu beni,
mi scurri dintr’ ‘u sangu e dintr’ ‘i vini,
di quandu quatrarella du ‘u barcuni
iu m’ affacciava,e sutta ,allu purtuni
c’ era llu ‘nnammuratu miu ca s’ aspittava
mu ‘na guardata ‘i supra iu ci ‘a dava.
Cchi paisi è Nicastru!
Si tu ti sbigghji all’ alba,di matina,
quandu l’aria è cchjù fhrisca ed è cchjù fhjina,
‘n luntananza vidi azzurru ‘u mari,
ca trimulia du ‘u suli allu livari.
Da ‘a parti opposta s’ izanu ‘i muntagni,
fhitti d’ abiti,di pini e di castagni,
muntagni ca su’ fhorti e ‘ndispunenti,
ricchi di vuaschi amici ed accugghjenti,
nduvi l’ anima mia si po’ placari
si puru sula ci vaju a mi sburiari.
C’è ‘na pianura tutta virdianti
ccu zagari e violi ‘nebrianti
ca tutti ‘i sianzi ti sianti sturdiri,
si ‘st’ aria affatturata tu rispiri.
Ppi chini soffri cci su’ l’ acqui termali,
‘nu paradisu ca ‘un nci nd’è lu ‘guali.
‘Nu vuascu addurusu ‘i rosi e gersumini
nduvi aggilluzzi volanu e farfallini.
‘Ntra ‘na cibbia di acqua lustrali
Ti pua purifhicari d’ ogni mali.
‘Stu paisi ‘nu donu è du ‘u Signuri,
ringrazjamulu,divuti a tutti l’uri.
E di ‘i strati,e di ‘i gghjasi ,puru di ‘i chjazzi,
e di ‘i rughi,di ‘i vichi e di ‘i palazzi,
di ‘i villi,di ‘i putighi e du ‘u mercatu,
di tuttu quantu m’ haju ‘nnammuratu,
ed è n’ amuri randi e randi assai
ca siantu ‘n cori e ca ‘un mi lassa mmai.
Si ogni petra parrari mi putera,
chissà cchi storji e vatuli cuntera!
E llu castiallu,pua, ‘un ndi parramu!
Normannu, affascinanti e tuttu stranu.
‘Nu rudari tuttu sdirrupatu,
ma cchi tesori ,dintra, du ‘u passatu
si ci ponu truvari e no licerti
o cani o serpi o gatti sulamenti.
L’ urtima cosa ca iu vuagghju diri
è ppi lla genti ca è bona e gintili.
I Nicastrisi su’ allegri e giuviali,
ccu tutti ‘i fhuristiari su’ ospitali.

       Luciana Parlati