‘U tamarru’ e ra serpa
Il bifolco e il serpente
Criju ca vinn‘aviti ‘e ricurdare:
‘Na vota ‘nu tamarru corazzune,
Vidìennu ‘nu curzune
Chi stava ppe’ spirare,
‘U ‘mmiviscìu, dunànnule riciettu
Intra ‘na rasa ‘e piettu.
Ma chiru scilliratu
(Quannu dici curzune!)
‘Mparu pigliàudi jatu,
‘U capu muzicune
Le dezedi vicinu
A cchira minna, dduve avìa ppusatu
‘A capu ppe’ cuscinu!
E sì nu’ffora statu
Ca ‘nu bbuonu varvieri,
Praticu d”o mistieri,
Le fucàu ra firita,
Cce appizzava ra vita!
Pped’ogned’àutru,
‘ssa lizzione amara
Avèradi giuvatu;
Ma ‘nu tamarru, capituostu natu,
Pate e ‘nnu ‘mpara!
‘Mpatti, cumu vidìu ‘nna ciucciarella
Chi s’era a ra capizza ‘ncatturata
E stava, ppovarella,
Ppe’ scigulare de ‘na pinninata,
A ru ‘mpàru currìu ppe’ ra tirare;
M’ ‘a ra squatricijata
Chi chilla fice,‘e ‘n terra ppe’ s‘azare,
Le sparàu, nnu’ bbulennu,‘na cucchiata
De cauci a re vudella
E cce appizzau ra pella.
Ad aiutare i mali sunu guai:
M’ad’aiutare i ciuoti è ppieju assai!
criju ca .....
penso che dovete ricordarvene
in dialetto il verbo dovere viene sostituito dal verbo avere
aju 'e jire : devo andare
aviti 'e criscere : dovete crescere
nu tamarru corazzune
tamarru :abitante delle campagne; bifolco
corazzune: dal cuore sensibile
curzune : serpente
spirare : morire
mmiviscire : rivivere
riciettu: ricovero
rasa: parte
intra na rasa 'e piettu
da una parte del petto
jatu : fiato, respiro
pigliaudi jatu : riprese il respiro
varvieri : barbiere
appizzava : perdeva
capituostu : testardo
'mpatti: infatti
'ncatturata: attorcigliata
scigulare :scivolare
pinninata : pendio
squatricijare : dibattersi, divincolarsi
cucchiata : paio
mali : cattivi
ciuotu: ingenui, un po' stupidi
Nessun commento:
Posta un commento