Un me fare parrare!

 Za Maria sta sula a ru fuocularu.

Vattenu a ra porta.

- oh za Marì, ce si' ?

- Se, tu beddra chine si'?

- Sugnu  'ntonetta!

- ntonetta chine?

- 'ntonetta 'e Cuncettina!

-Trasi, trasi; ammutta a porta e trasi!

- Oh za Marì! Cumu stai? Stai bbona?

- E chi bue!? Sugnu vecchia; sugnu bona ppe ru campusantu! Figliama, pigliate na seggia e sedete.

- 'Un puozzu, tiegnu pressa.

- E sedete nu pocu; chi tieni e fare! pare ca tieni i figli ca te ciangenu! Sedete. E diceme, mammata cumu sta?

- Un sta tantu bona!Tene nu pocu e reuma, se muotica pocu; sta sempre a ru liettu. 

- E chi bbue! L'annicieddri sue ce l'ha puru iddra! ce vo' pacianza!  Quann'era giuvane fatigava chi paria nu mulu!

- Pacianza n'avimu tanta! E ri parienti tue duve su' juti ?

- E iu chi ne sacciu! parica u dicenu a mie ? 

-  Cumu! Un ce cridu! Po essere! siti a ra  stessa casa!

- Chi te dicu beddra!  A verità! A pura e santa verità! Iu a sta casa è cumu si 'un ce fosse! ce sugnu e 'un ce sugnu! Spennenu e spannanu senza me dire nente! Iu me fazzu l'affari mie!  Un me fare parrare! Un sacciu nente!  

- Su' juti a ra robba?

-Ah, ah, ah!.. Allora un  capisci o 'un bue capiscire! T'aju dittu ca a mie un me dicenu nente; un me fare parrare.  È cumu si figli un n'avera mai avuti! Megliu nu puorcu ca te c'allisci u mussu!

- oh za Marì chi dici?  Un jestimare! 

- Chi dicu!... Un me fare parrare ca è megliu; ca si parru vaju diritta a ru mpiernu!

- Chi t'anu fattu?

 - Chi m'anu fattu? Nente. Chi m'anu fattu! Chi bue, su' guagliuni e pensanu sulu a cuglinijare; mai na vota chi pensanu  si l'autri anu bisuognu ... chi  dicu, e nu bicchiere d'acqua.

- Vue acqua?   T'a vaju  pigliu.

- No, un ne vuogliu. Era cussì ppe parrare. È ca  ste fimmine e mo, su scustumate.  Penzanu sulu a vacabbunnare. Su' cumu gaddrine scacate. Un su' mancu bbone a fare figli.  Iu n'aju avutu sette e ppe decianni, maritumma è statu a ra Merica. 'Un tienu rispettu. Si a notte e chiami ca te serve na cosa, un se azanu mancu si muori. Chiamanu u maritu. Iu a ri tiempi mie a maritumma un ru facìa azare mai. Donnama l'aju tenuta supra na guantera.

- Oh za Marì. norata un dè na fimmina mala!

- E' bbona; è bbona! chi bue ca te dicu?! Un me fare parrare. Un sacciu nente.  A ra casa sua era tutta gente bona. Gente santa!  C'era sempre u paracu dintra!

- E chi facìa? 

- A mie m'u dimanni? Iu chi nne sacciu! Ma a gente parra!  E chi bue? Ce su' tanti vastasi intra stu munnu!

 - Vue dire ca...

- Iu un sacciu nente! Quannu puozzu, me dicu nu rusariu.  Chi t'aju e dire?  A sta  vineddra c'è chira spatornata d'a Fruntera  chi se tene u figliu d'u varviere.

- Daveru?

- Un me fare parrare ca certe vote  a sta ruga è cumu si ce fosse nu burdellu. . L'ha' vistu cumu se veste Mariantonia?

- No! cumu se veste ?

- Tene sempre e cosce e fore. Guardala cumu s'annatica quannu camina!  Pianzica tene ncuna cosa chi le vruscia.  L'aju vista parrare cu Battista. Erano mussu a mussu.

 - Battista chine?

- Battista e' Nicola e Battista.

- Ma è 'nzuratu?

- E chi vo' dire!  Si propriu ciota! Quannu a fimmina vo, l'uominu piglia.  Un me fare parrare. Mariantonia è' na specie de diavulu ncarnatu. Cussì cumu Lina a nicastrise chi se 'mpruscina cu tuttu u vicinatu. Pare ca tene 'u fuocu mienzu e gambe! Vanu a ra missa sulu ppe  mustrare a vesta nova.  Un me fare parrare.. un me fare... Era prena e ru maritu 'un c'era.  E chiru ciuatu se l'è muccata, mbece e ce fare na bona mazziata, Iu, sulu si m'affacciava, maritumma m'inchìa e botte. Mianzu a via, un parrava mai ccu nessunu; buongiorno e buonasera e l'uocchi sempre 'nterra.  Mo tira n'atra aria; u munnu va a ra storta. Uomini e fimmine stanu sempre a parrare. Un c'è cchiù religione. E cummari Rosina l'ha' vista quante vote se va a cumpessare!  chi sa chi ce cunta a ru prievite.  Fa ra santa; se a santa diavula! Un me fare parrare. Iu d'i fatti e l'autri un me vuogliu  sapire. Megliu ca staju cita e me dicu nu rusariu.

- Oh za Marì, mi n'aju e jire ca è scuratu.

- E vavatinna beddra, vavatinne. ca mo me dicu nu rusariu. U signure mu te benedice. Salutamme a mammata ca n'avimu sempre volutu bene. Cumu due suoru chi se spartenu 'u suonnu, È na fimmina bona Pemmu u Signure a mantene n'atri cient'anni.

Cinque minuti dopo arriva a nora:

-Oi ma', duve si'?

-Sugnu ccà  ra cammera e liettu.

- Chi fai?

-Me dicu nu rusariu ppe l'anima d'i muorti.

- C'è statu 'ncunu?

- Se c'è stata a figlia e Cuncettina.

-Chi bolia?

-  Chi bolia! Nente.  Chisse su fimmine chi 'un sanu chi fare e vanu e case case ppe sapire; pe scarminare lana. M'ha cuntatu ca a mamma 'un sta bona. Un  fa cchiù nente e se lamenta. Sta sempre a ru liettu. Cummanna a tutti. Puru l'acqua a ru liettu se fa portare. Un me fare parrare ca iu 'a canusciu bona de quannu era guagliuna.Un me fare parrare, ca si parru... Vo fare a signora ed era sempre  cu ru culu e fore... E ru sapimu tutti e chine è figlia.  Me ricuordu e quannu era quatrara. Quantu n'ha cumminatu! Piaju e na vipera. Ppe' ru male ch'ha fattu cientu vote avesse divutu e crepare. Un me fare parrare, un me fare...

                                                                         Antonio Coltellaro