Culu tunnu

A ‘stu munnu,

Vale ssulu...

Culu tunnu!

   Ti nne ridi?

Nun ce cridi?

E ttu piglia

‘Na buttiglia:

Senza culu cchi nne fai?

E’ ‘nnu guai!

L ‘ùagliu funne

e tte cùnne!

  ‘Nu spurtune

sculacchjatu

L‘accattère?

‘U ru vulere

Mancu, criju, rigalatu!

Haju datu,

Stamatina,

 ‘nu cazune de frannina,

Nuovu, nuovu, a ‘nnu strazzatu;

‘Nu grubbicchju cc‘era ssulu

A ‘nna natica de culu...

L’ha ppigliatu,

L ‘hadi ampratu,

L’ha gguardatu

E l’ha Jittatu;

Ed  ha ddittu sulu, sulu:l

 -U’ ru vuagliu! E’ ruttu ‘n culu! —

Si te capita, ddemane,

‘Na scuppetta senza cane,

Ppe’ sparare pûe arranciare:

Ccu ‘na petra si cce vatti

‘Nu tubbettu ‘nu ru scatti?

‘Un pûe fare nente sulu

Si ‘u’ d’ha cculu.

Cchi ripari?

Cumu spari?

De ‘nu cagnu de rugagnu

Tina, vutte, varrilazzu,

Me sai dire cchi nne fazzu

Si nun tene ru timpagnu?

‘U’ mm’aggiuva

Nnè ppe’ mmustu nnè ppe’ d’uva;

Ma si tene ru culacchju

Tunnu e funnu,è ‘n ‘autru cacchju!

L ‘acu è ttuttu,

Ma, ‘ntramente,

Quannu cce ha  ru culu ruttu,

Caru amicu, ‘u’ bbale nnente!

Ah! ‘Nnu culu tunnu, tunnu!

E’ ru prieju de ‘stu munnu!

Quannu è ttantu

Guardu e ‘ncantu!

Quannu è ggrassu

Viju e ‘ntassu!

Culu musciu

Nnun fa scrusciu,

Culu grassu,

Ad ogne passu

Natichija e scattarija!

Gruollulija  e abballarija!

   Quannu a spassu

Ti nne vai ‘ssu munnu munnu

 Iu te viju e mme ricriju,

Culu grassu! CuIu tunnu!

Pistu, pistu,

Nun rrisistu!

Chjnu, chjnu,

M’abbicinu!

Tunnu, tunnu,

Mi cce junnu!

Grassu, grassu,

Nun te Iassu!

Culu pistu,

Culu chjnu,

CuIu tunnu,

Culu grassu!

  A ‘nnu strittu si te ‘ncappu

Chjanu, chjanu,

Ccu ‘sta manu,

Ppe ‘nna natica t ‘acchjappu!

E ssi viju ca tu vue,

Cce l’appappu

Ttutte e due!

   Ma cumpari,

Patti chiari:

Nummu spari!

Ca si nnò, mannaia nnullu,

Ccu ‘nnu sùvaru t’ammullu.

                         Vittorio Butera

 

Glossario:

l'uagliu funne e te cunne : l'olio gocciola e ti sporca

grubbicchiu: piccolo buco

frannina: flanella

suvaru: sughero