L’uarcu
L’uarcu di ‘i storii ‘i ‘na vota
-ni dicianu- è sulu fhantasja!
Ma, si ‘nu pocu ci pianzu, accussì ‘un pari a mia.
-‘Un jiiri appriassu a nissunu ca ti po’ tantari,
‘na caramella, ‘nu gelatu vua mangiari?-
-di nissunu fhuristiari fhatti abbicinari,
e quanti, quanti atri raccumandazioni
e tanti ancora nua ndi riciviamu,
e ‘ntr’a ricchja ‘a vuci ‘i tata nua sintiamu.
Ma certi voti,e nua cchi ‘ndi sapiamu?,
l’uarcu stavia propriu llà,’ntr’ ‘a casa ammucciatu,
e nissunu mai si l’ avera ‘mmagginatu
ca putia essari ‘nu patri, ‘nu zianu, ‘nu canatu,
‘nu vicinu di casa, n’ amicu cunsidiratu cumu ‘nu parenti,
putia puru essari ‘nu nonnu o unu ca ‘un t’è nenti,
‘nu prifhissuri alla schola, ‘nu miadicu allu ‘spitali,
e………senza ipocrisia,
c’era puru ‘nu priaviti dintra ‘a sacristia.
E quandu ‘u straziu di ‘i carni niguru succidia,
‘a cosa fhinia llà e ‘un si dicia,
ma ‘a fherita ppi sempri mai guaria.
E quanti, quanti su stati ‘i guagghjunelli
ca su stati allurdati, e supra ‘ a pelli
e dintra l’ anima hanu avutu bullatu
‘nu marchju di vrigogna e di piccatu?
L’ uarcu alla vista, pari n’ uaminu normali,
ma dintra è n’ essari luardu, piaju ‘i ‘nu nimali,
e, puru ca si l’ ha ogni tantu scampitata,
e la giustizia terrena l’ ha evitata,
‘a chjamata du ‘u Patriternu s’ ha d’ aspittari
e, a vogghja ca ‘mbrogghja, ciangi, e si minti a prigari,
‘ntr’ o fuacu du ‘u ‘mpiarnu ha di jiiri a vrucjari
e ppi l’ eternità ci ha di ristari.
L. Parlati (da Internet)
Nessun commento:
Posta un commento