Premio Vittorio Butera.

A FESTA DE VISORA.
E' sempre duce l'aria Cujientara
ma u mise e agustu è tutta cchiù speciale
se risbiglianu e case e ri viali
cantanu aggiaddri supra le iumare.

S'affaccia de nu pizzu chiru mare
e ddè luntanu sona na canzùna
u sule a sira sinne scinne chianu
pittànnu u cialu de tanti culùri.
nu mise dedicatu ara Madonna
chi na gghìasa circàu dduve pregare
e ddè tanti anni e ddè tiampi luntani
chiru juarnu nessunu po scordare.
Venìa l'urtimu vennari d'agustu
e a gente a piadi se mintìa n'camìnu
e scauzi,affritti e chini de duluri
Jianu cantannu le canzune sante.
partìanu de nicastru e Marturanu
de a Motta,santu mangu e petranìa
de falerna ,Nucera e Jiazzaria,
de i munti de la Sila e ddè Sciglianu.
Portavanu nu vutu de dinari
stipàti a lira a lira tuttu l'annu
i mintìanu ari piadi de a Madonna
ccù ri suspiri e n'urtima speranza.
Circavanu na grazzia li malati
ca sordi e medicine nu d'avianu
circavanu salute ppè ri figli
partùti ppè re Meriche luntane.
U sabatu a sira cchiù cuntianti
tutti ntuarnu ara gghiasa arrocchiati
inchìanu l'ariu e canti e serenate
de giri de fadiglie e panni russi.
a Duminica jiurìanu li barcùni
de linu rigamatu e ddè dommaschi
e tutti nsèma ccù musica avanti
facìanu a prucessione ara Madonna.
ccù luci e spari se chiudìa ra festa
e ognunu versu a casa sinne Jìa
cantannu ancòre ncuna Ave Maria
ccù tuttu u core chinu de speranza.
De seculi ne su passati tanti
ma chira divuzione resta sempre......
e ancòre e chire meriche luntane
pàrtenu ppè Visora l'Emigranti...!
(Maria grazia Paola-poesia I° classificata-Premio Regionale VITTORIO BUTERA)