L'uemmini

L'ùemmini simu nati vrigugnusi
e 'a fìmmina ccu llùecchi n'ha scquagliatu,
a cchiru bene 'e Ddiju simu cumppùsi,

chira prisenza sua n'ha stravisatu.


Quannu l'ha ffatta Ddiju n'ha ddata nuda,
urnata e ttunna ppe nn'innamurare,
ppe 'u' l'ammarrare 'ha ffatta senza cuda
e l'ùemu mancu è gghjùtu ar'annascare.
Ccuss'atra malanova tinta e scura
currìemu u riscu 'e 'u' nni murtipricare,
allura Ddiju ha ccuvìertu 'a criatura
e nni l'ha ffatta a llùengu disiare.
De supra chiru cùerpu genuinu
e gghjùtu a cci calare na suttana,
de 'nntùernu na gunneddra e u mantisinu,
e nni l'ha ccunsignata de pacchiana.
Pue quannu amu vidùtu l'urratura
de la cammisa ca scpuntave ffore,
ccu cchiru pocu 'e jàncu 'e l'armatura
supr'u garrune, n'è scasatu u core.
Cchi paradisu quannu la gunneddra
si l'abazave ccu disiburtura,
d'u pìettu s'allargave 'a cammiseddra
e ttrascparìe na 'nttacca 'e scullatura!
'A cosa c'un si vide, si capisce
ca scùeppule u cervìeddru e tti l'accasce,
cchjù ti cci affissi e cchjù la pena crisce
e u ficatu e ru core ti si scasce.
Quann'è ch'i focarìesti su' arrivati?
doppu c''a parte è stata cuveruta,
e su' 'mpucati puru li grastati
quann'iddra a ppocu a ppocu è scuveruta.
E cchi vvidiè....! perzìnu i quatrarìeddri,
de mamme su' scprittati cumu paddre,
parìenu vìerri, zìmmeri e vitìeddri,
e bbonusia le fìmmine cavaddre.
Mo 'a vidi in minigonna ca si scpoglie
de sutta a ssupra fin'are 'nccinaglie,
u vùemmicu ti vene ccu re doglie,
ca mancu u ciùcciu a maju cchjù cci raglie.
Si vìvere 'u' vulimu 'e nustargia,
de quannu la vidìemu ara funtana
ccu 'a vozza china 'e canti e fantasia,
turnàmula a vestire de pacchiana.
(Giovanni Amendola)