Ritorno al paese

'A ricota d'umigratu

Turnàu di Stati Uniti nu paisanu,

vint’anni doppu chi sinn’ere gghjùtu,

a ttutti salutave ccu ra manu,

ugnùnu riscpunnìe: “bonuvenùtu”.

Giràu dui jùerni e ddisse:”oh cchi mmistèru!

a ssu paìse nu’ cci su’ scarppàri!

 

e ssi cci pìenzu nu’ mi pare vveru

ca si su’ ppìerzi puru li crapàri!

Circcàvi de nu mastru cusitùre

ppe ffare a nna cammìsa na stiràta,

e dòppu chi girài nu paru d’ure

mi l’haju ‘e vut’e mìntere arrappàta.

Si pò ssapìre cumu vanu i fatti

ca nu’ cci sù cchjù mmastri a ssu paìse?”

sun’ara scola e ‘ncchjòvenu ritratti,

e dde sudùri scpònzenu cammìse.

“Chi nn’è de chiru mastru faligname

ca mi chiamave ppe girare ‘a mola”

tu tànnu lu lassasti mort’e fame,

e mmò è stipendiàtu ccu ra scòla

“Allura si su’ ffatti prufessùri

de storia, de latinu e de sturnelli?”

cchi sta cunttànnu! fùnnenu sudùri

jettànnuu sangu a ffare li bidelli.

“E ll’atri mastri su’ stipendiàti

o su’ rimasti a ffare lì pezzènti?”

chiri cchjù ffìssa l’hanu carcerati

e ffore su’ rrimasti i delinquenti.

“Cum’ati fattu ara cunzzàre male

sa bella terra stritta e longarìna!

na votaavìed’a furma ‘e nu stivale

e mmò l’ati ridùtta a nna purccìna?”

Si n’ha truvatu affrìtti e stravisàti,

d’un nni sarvare mancu ‘u Patreternu,

‘a curpa l’hanu tutt’i sinnacàti

ccu ll’atri capizzùni du cuvèrnu.

E mmò mi sienti? circa de scappàre,

ritornetìnne prìestu dre li tui,

e cca, ti prìegu, làssani fricàre,

ch’i mali jùerni ni cianccìmu nui.

Poesia di Giovambattista Amendola