Migni Mogni

 Migni Mogni , di Dario Galli

Iu pàssu, ‘u jùarnu, e spàssu di ‘sta chjàzza,

però cchjù nun t’affrùntu, o ‘Ntonariallu!

Ti vìju sulamenti intra ‘u ritrattu

Chi tèni “Ciantuvinti”: ‘u bbirrittiallu

calàtu supr’à ‘rìcchji a ccajulìlla

e lla visera a ffhurma ‘i ciaramìru;

‘u giacchittuni ‘nsinca alli dinòcchja;

sbracatu ‘u pantaloni ssenza giru;

‘i scarpi scarcagnàti e lli quazìatti

sculuriscìuti e ssenza cchjù ggarruni;

‘a scolla russa chi sapìa llu tìampu

‘i quando “Ciantuvinti” era gguagghjùni….

‘Un ci lu fhai mò ‘nu pizzu-a-rrisu

alla signurinella chi spassìjia…..!

Di tìa mò resta ssulu ‘nu ritrattu

chi dintra ‘i ‘na vitrina ridi e spìja…….

‘Nu ritrattiallu dintra a ‘nna vitrina,

ccà, dduvi i vivi pàssanu fhumàndu……

‘Na cruci ‘n terra dintra ‘u Campusantu,

llà dduvi i muarti stànu ripusandu…..