Quannu te dice

Quannu te dice, 'nto', torna a ra casa!

mo su' tant'anni ca 'un tuorni chiù.

Vene ca n'assettamu cà a na rasa

e ragiunamu d'u tiempu chi un c'è chiù.

Te cuntu, de quann'ere nu guagliune

e te portava, mbrazza, a fatigare

d'u juornu chi cadisti a ru cavune

e pe na notte t'avia de cunzulare.

A bote, quannu u suonnu 'un me piglia,

e pe ra verità 'un duormu quasi mai,

pienzu e ripienzu a tutta sta famiglia

quannu a ra casa c'era nu via vai.

Sette figli cu tie aju crisciuti

e a unu a unu vinne siti juti

pe ru munnu ve siti sparpagliati

e a ra casa 'un siti mai tornati.

Passa ru juornu, njorna, torna scura

vene ru viernu, sinne va a stagione

vola ru tiempu, un sacciu quantu dura;

me pare cumu fosse a na prigione.

Vene ca te cuntu de cumu stu paise

edi cangiatu de quannu l'hai lassatu:

a terra è margia, e case sunu chiuse

nente è rimastu cum'era a ru passatu.

Chi tiempi, nto'! e quanta gente c'era!

ogni bota chi nescìe paria na fera.

Mo, si vai du paise supranu a ru suttanu

pe ra strada un vidi mancu nu cristianu.

vene quannu te dice, un t'appricare!

tieni famiglia ed hai e fatigare

però ricorditila, nto', sta cosa

oje ce sugnu, domani chine 'u sa!

                                                            Antonio Coltellaro