' A 'mmaculata
De chira loggia, oh na’, tu me chiamava,
e ccu dui zumpi iu subitu arrivava,
mentre tu, cu ru purtune apiartu,
aspettavi a mmia chi facia l’iartu.
Iu fujia lesta sutta chiru muru
duve, ‘nu juarnu, nu curzune scuru
de supra ’nu ruviettu ’ncatinatu
se liticava ccu ‘n’autru ‘nnamuratu.
Fujia lesta sutta chiru muru
ppè paura ca coddratu sule
venia subitu d'a notte u scuru.
Sutta chiru muru iu fujia lesta,
ppè nu’ perdere ‘a focara e ra festa:
-tiru ara corda e pignatiaddri rutti,
banda, grispeddre e ruseddre a tutti.
Fujia lesta sutta chiru muru
quannu petardi jettavanu ppè auguru
de’ chira Madonna ‘Mmaculata,
chi… chisà si mò s'è currivata
ppecchì gente a ppede cchiù 'un n’ha vidutu,
portare a Visora ppè patri e figli u vutu,
ppè chira strada sutta chire mura
dduve ‘na vota passavano ad ogni ura.
Ma ari curzuni chistu nu’ l’addulura.
Mo’ nu’ c’è cchju strada, muru e nanna
e aspettannu du cialu ‘ncuna manna
'un restanu ca e licerte e ri curzuni
a sse spartere du muru l’urtimi mmattuni.
Luisella Stranges
Nessun commento:
Posta un commento