Agosto conflentese

‘A FHESTA D’’A MADONNA D’I CUJJIENTI

di Arturo Moraca (di San Mango)



‘U vintisie d’agustu de chist’annu

a ri Cujjienti è ‘a fhesta d’’a Madonna

ed’ogne pellegrinu va mu adora

‘a Vergine Beata de Visora.



Cumu ‘na rinnineddha a primavera

‘e tornare a ru nidu campa e spera,

ccussì ‘stu mise tutti l’emigrati

tornanu a visitare i luachi amati



De ddhà, ‘ncerca de pane e de fhurtuna

sunu partuti tutti ad’unu ad’unu

ccu’ ‘na valigia vecchja de cartune

ligata ccu’ ‘nu lazzu o ‘nu curdune.



E dintra a chissa, ccu’ gelusia conzati,

tutti i ricuordi cari de ‘na vita

e ‘mmienzu a chiddhi nun potìa mancare

‘a Vergine d’’a Serra Campanara.



Ad’Iddha chine va ru munnu munnu

spessu cce parra ccu’ sugliuttu e abbunnu;

ad’Iddha se rivolgia, prega e spera

mu torna ancore, ‘e nuovu, primavera.



Ad’Iddha penza pue matina e sira;

ad’Iddha leva sempre ‘na preghiera.

‘A grazzia chi cce circa è sempre una

chiddha ‘e tornare, ‘nziemi a ra fhurtuna.



Cumu ‘nu lupu chi s’è alluntanatu

torna ppe’ istintu sempre a ra fhuresta,

chine ‘stu munnu munnu si nn’è jutu

torna ppe’ vutu ‘u juornu de la fhesta.



E’ chissu lu miraculu cchjù ranne

chi se ripeta sempre tutti l’anni.

Cumu ‘na jocca ccu’ ri pulicini

‘sta Mamma Ranne, i fhigli ‘i vo’ vicini.



‘U juornu de la fhesta, quanti gienti

passìanu ppe’ ra via ccu’ ri parienti!

Su’ tutti allegri, tutti su’ cuntienti,

…sunu tornati tutti a ri Cujjienti





:::::::::::::::::::::::::::::::::





Passatu ‘u santu, pue passata ‘a fhesta

e a ‘stu paise quasi nuddhu resta.

Ccu’ l’uacchj russi e ‘ncore ‘nu dulure

ognunu torna dduve cc’è ‘u lavuru.





Restanu quattru viecchj abbannunati,

‘e case chjuse e sulitaria ‘a strata.

Arriva viernu, ‘u friddu d’’a nivera

…ppe’ tanti ‘un torna cchjù la primavera