A festa d'a Madonna: Cose bone e cose male

Tante cose bone e due o tri male

a ra festa d'a madonna, chist'annu, ce su state tante cose bone e due o tri male.
Anu mintutu finarmente a navetta. Cussì chine lassava a machina luntana potia jire a ru paise e tornare cu ra navetta. A cosa mala è ca l'autobus era granne e ogni tantu s'avia de fermare pecchì c'eranu autre machine o 'e bancareddre.
N'atra cosa mala è ca l'orario era sinu a re nove d'a sira, ma a re sette 'e menza autobus 'un si ne su' visti chiù.


Cussì tannta gente (iu era tra chissi) ha divutu 'e saglire strada strada a pede e a ru scuru ppe due chilometri sinu a ru campu sportivu . E penzare ca a ra partenza n'anu fattu pagare 'u bigliettu ppe ra juta e ra venuta (2 euro). C'era puru n'avvisu chi dicia : " ultima corsa ore 21". Nessunu n'ha aiutatu. Sulu i carabinieri se su dati e fare.

N'atra cosa bona è ca chist'annu su aumentati i gabinetti (grazie a don Adamo!) . Finarmente!
Sunu granni, puliti e nietti. Però sunu ancora pochi. Durante a festa a gente è tanta! Ci ne volerano autri paise paise. Si ne poterano fare a pumetta vicinu u municipiu.

Durante a festa e vie su lorde. Ce volerano chiù " cassonetti" e ri spazzini averanu e passare chiù de na vota. A gente chi vene de fore vide u paise sulu intra sti juorni.

Durante a festa, si capita ncuna cosa è difficile nescire cu na machina o pieju cu n'ambulanza. Ce su bancareddre a tutti lati. Ce volera na sistemazione migliore. E destre e ra strada vicinu Pumetta averano 'e essere libere. Pecchì, pe re bancareddre, un se utilizza 'a scinnuta d'u Piru?

na bona cosa è stata d'organizzare na mostra d'i prodotti cujjentari e d'e 'ndustrie picciule d'u paise. Cussì a gente 'i canusce e i cujjentari puotu fare chiù affari. M'ha fattu piacire ca era presente puru San Mazziu. Si paise e frazioni s'aiutanu è megliu pe tutti.