Emigrazione

Racconti di emigrazione:

" versu 'u cinquanta avia vintanni e facia l'amure ccu Nicola. Iddru fatigava già cumu sartu, ma a ru paise i sordi se pigliavanu 'u juornu 'e mai e cussì s'è fattu mannare l'attu e richiamu e dopu chi ne simu spusati è partutu ppe' Torontu, a ru Cannatà. Ha trovatu subbitu 'e fatigare, pecchì l'anu aiutatu i frati ch'eranu juti tri anni prima. Cussì m'ha mannatu 'u richiamu , i sordi ed iu me sugnu preparata ppe' partire. 'E carte me l'ha preparate Curteddraru ppe' partire ccu ra Frotta Lauru.
Ma prima 'e partire avia de jire a ra mbasciata du Cannatà ppe' passare a visita. Iu 'un era mai nisciuta d'u paise e cussì me sugnu fatta accumpagnare de 'nu ziu miu.
Cumu Diu ha bolutu, dopu nu viaggiu luongu, simu arrivati a ra mbasciata. M'anu fattu tante domanne e pui m'anu visitatu, d'a capu a ri piedi: 'u ficatu,'u core, 'u sangu, 'e manu e puru i dienti.
M'anu puru fattu spogliare e iu, 'mienzu a tanta gente me sugnu puru vrigognata. Ppe' furtuna 'un m'anu trovatu nessuna malatia.
Due simane dopu chi sugnu tornata a ru paise, d'a 'mbasciata m'anu mannatu a dire, ccu na raccumannata, ca potia partire.
M'aju ricogliutu nu pocu 'e robbe e l'aju mintute intra dui cartuni (valigge 'un n'avia): uogliu, sazizze, casu e panname. Mamma m'avia cumpratu a cridenza : cazuniaddri, quazietti e cammise. Cumu veste avia sulu chiddra 'e cuondru.
'U juornu prima 'e partire, era tantu 'u dulure de ne lassare, ca 'un simu risciuti a parrare né ccu mamma né ccu patrimma.
Sugnu partuta 'na matina priestu ccu ru postale. Me ricuardu ca 'u guidava Peppariaddru Calabria. C'era tanta gente e me sugnu salutata e abbrazzata ccu tutti. Penzava: chisà si cce tuornu ancora a stu paise.... chisà si a mamma e tata 'i viju ancora...
Sugnu juta prima a Nicastru e pue a Sant'Eufemia, dduve aju pigliatu 'u trenu ppe' Napuli. Stavota a m'accumpagnare c'era nu cuginu miu.
Quannu simu arrivati era tutta 'nciotata. A Napuli c'era na cumpusione chi 'un be dicu. Pieju d'i Cujjienti 'u juornu 'a Madonna. Iu stavia attenta a ri pacchi ca me spagnava ca 'ncunu m'i bolia futtire. Simu juti a ru puortu e pue a ra Frotta Lauru a me fare dare 'u bigliettu. Ne simu salutati ccu cuginuma e sugnu partuta. I primi juorni me suognu vommicata, pue c'aju fattu l'abitudine e sugnu stata bbona. A nova iorca m'aspettava maritumma. Iddru parrava già nu pocu 'ngrese e, quannu m'anu guardatu chi portava, ha parratu ccu ra polizia. Penza ca m'anu fattu
cacciare tuttu: sazizze, casu, uogliu e panname. Pue aiu divutu mintere tuttu n'atra vota intra.
E' jiuta bbona ca un d'anu trovatu nente. Pue ccu na machina simu jutu a na stazione. Se chiamava Penn Station (l'aiu saputu dopu). Simu partutu ppe' Torontu. Avimu passatu tante stazioni, ma a mie i numi 'un me dicianu nente. Dopo dudici ure simu arrivati a Toronto.
Era na città granne ca ti ce perdie. 'Un canuscia nissunu. A gente 'un me capiscia. Penzava ca potia sopportare tuttu, tantu, me dicia, ce riestu sulu nu paru d'anni e pue tornamu a ru paise.
De tannu su passati cchiù de cinquant'anni. A ru paise 'un sugnu cchiu tornata. Mamma e tata su' muorti ed iu campu ccu tanta malincunia.

Marietta