Enzù, famme sentì si tiene ‘a freva,
ajere he fatto ‘a tosse, tutt’’o juorno…”-
-“ E’ ampresse, Rusì, pe’ me levà ‘a tuorno,
‘o Pataterno, ancora, nun me vò!”-
- “ Enzù, che dici mai, ma fusse scemo?
Ca io, senza ‘e te, comme facesse!!-
-“ Rusì, tu senza ‘e me, tu campe ‘o stesso,
songh’io ca nun sapesse comme fa!”-
- “ Vattenne, va, buffò, che vai dicenno,
tu si’ na quercia, nun t’abbatte mai…”-
-“ No, Rusinella mia, tu chesto ‘o ssai,
fra me e te, ‘a cchiù tosta, ccà, si’ tu!
Tu me prepari ‘e panne, ogni matina,
intanto ca già è pronto ‘o cafettiello,
quand’esco, ncapa, m’accuonce ‘o cappiello,
so’ cinquant’anne…e fai chesto pe’ mme!”-
- “ Va bene, va, ‘a freva nun ‘a tiene,
fatte dduje passe, nun scurdà ‘o bastone,
Dio t’accumpagna, va, va, statte buono
e nun tricà, t’aspetto pe’ mangià!”
- Di Martina Salvato
Nessun commento:
Posta un commento