un te nzurare

 A vue dicu spaturnati
de nzurare 'un ne parrati
Ca de tutte le manere 
Sempre guai è la mugliere.
 Si la pigli troppo bella
ce hai de fare a sentinella,
e si 'ncasu 'un ci la fai
Tu 'nquetatu sempre  stai.


Si la pigli menza brutta
Ti cce fai la cucca tutti.
-Cchi malora, era cecatu?-
Si la pigli auta assai, 
Tutti i giorni sentirai:
-L'ha pigliata, chill'amicu,
Ppe ne cogliere le ficu- 
Si la pigli vascia vascia
La pue chiudere a na cascia,:
Chi la chiama scimiella,
chine a chiama paparella.
Si la pigli pittirilla
te farrà na murra e figli,
Ccu mammane e ccu lattare
Sempre divi cuntrattare.
Si ti piglina vizzocca, 
ccu lu prievite va joca
De tie  sempre sta luntanu
Ccu li patannuostri mmanu.
Si te pigli 'na cattiva
D'ogni cosa se curriva:
- La bon'anima  chi è muortu
sempre m'era de cumpuortu-
Si te pigli pue na grassa
l'hai  e portare sempre a spassu.
Si nun ce la vue portare
Cchiù se ngrassa e pò scattare.
Si te pigli pue na lenta; 
ccu chill'ossa te crapenta;
 Nu palu vestutu pare
Si alla banna tua vo' stare.
Duncu 'u miegliu chi vue  fare
statte schiettu e un te 'nzurare.
 Anonimo