'A vedova (soliloquio)

 Domani vaju a Guglia

'U luni ammaccu 'u linu 

me vasciu la fadiglia

me mintu 'u mantesinu.

 

 'U marti la lissia;

lu puortu 'lla, a ru jume;

Me dicu 'a litania

de Diu priegu lu nume.

 

'U miercuri dijunu

ca de mangiare 'un tiegnu;

Me mangiu quarche  prunu,

d'a chiesa vaju e bbiegnu.

 

'U juovi fazzu festa;

me vuogliu riposare

e doppu, cangiu vesta 

ca a luttu un vuogliu stare...

 

 Mo chi Nicola è muortu 

iu me maritu 'e friscu

e si lu luttu puortu

iu pierdu a don Franciscu.

 

Lu vennari  campiju

de la finestra, e cusu,

'u Sabbatu, si 'u viju

L'amure miu me spusu.

 

Dante Raso 

L'uortulanu

De juornu zappu sempre l'uorticiellu,

De lu vurvinu scippu 'a chianticella,

Ccu ru pirune fazzu 'u pertusillu,

E ri suduri stuju a ra fadella.

 

Pue ficcu  a ru pertusillu 'a milngiana,

'U pimaduoru  chiantu 'ppe 'nsalata

 E pue, doppu  chiantata, d'a funtana

Fazzu a lu surcu d'acqua 'na passata.

 

Tramente, abbicinatu  è menzijuornu;

'nu pocu 'e fame sientu, e, già stancatu,

'nu muorzu 'e pane tuostu,  'e dopu tuornu 

mu chiantu autre  cosuzze a 'ru 'nzurcatu.

 

Lattuche, pimaduori, milangiane,

li piparuoli, verze e pastinache,

canili, pisilli, chiantu le vajane

chi fau de la regina le surache... 

 

E dopu chi crisciutu a tuttu cose 

si vinnu  pozz'iu pocu me 'mporta

ppecchì, cogliennu juri e mazzi 'e rose,

d'adduru campu  ccu ra mia consorte...

 

e poi a l'atunnu  cuogliu le castagne,

pemmu 'e 'mpuornu o fazzu  'e ruselle;

me fazzu caminate  a re campagne

e passu 'u tiempu a re jornate belle. 

 

 Dante Raso 

 Note:

vurvinu: semenzaio pirune:piolo  campu: vivo

'mpuornu: inforno  ruselle: caldarroste. piparuoli: peperoni

pertusillu: buco. 

 

Epifania

 

 'ncipiti, 'nciapiti jiennu a ra via,

incuntrau malinconia 

e si und'era  ppe l'anchi stuortu

'ncipiti,  'nciapiti  era muortu

 

note: 'ncipiti ... : asino 

malinconia: lupo 

anchistuortu: cane. 

Feste

 Buon anno a tutti.

'U Casciune

 'u casciune edi na cascia granne assai

ed hai d'avire puza de gigante 

Mu azi la chiudenna, quannu vai 

Mu pigli, o mu cce minti, s'è bacante.

 

Iu me ricuardu, quannu lu chiudiamu,

Sbattia chi tu sentie 'na cannunata.

Stipatu tuttucose cce teniamu:

Mustazzuoli de mele, 'na furnata.

 

Nuci, castagne; assai ficu siccate

Surache e ri turduni ppe 'mpilare;

Capicolla, prisutti  e ssuppressate

E casu tuostu, buonu ppe grattare...

 

Lu granu, lu nnianu; cose duce

Ppe Natale, o ppe ghjuorni  ricordati;

Le ficu chjne 'e nuci - mise a cruce -

Spizzicaturi, buoni ppe malati...

 

Dante Raso 

'U surdatu

 Nu giuvane chi quannu jia a ra chiazza

Ognunu n'avantava ra spertizza, 

cchiu tardu lu vestieru de corazza

e, a ra guerra, soffria ppe ra lordizza! 

  S'avia crisciutu, longa, na varvazza

Ma na granata, 'ntruncu, de tunnizza

'na gamma cce truncau, mentre a re vrazza 

'na scaglia de granata li se 'mpizza. 

 

E ru nimicu, ccu na sciabulazza

le duna supra  a capu  e ru stennizza.

Mo, congedatu, è chinu 'e cuntentizza.

 

ppecchì 'u generale, ccu n'abbrazza

l'ha decoratu ppe tanta prodizza 

ca nullu fu capace mu l'ammazza. 

Dante Raso 

 

 Note: spertizza: intelligenza  lordizza:sporcizia

tunnizza; tonda 

 

 

 

 

 

 

 

 

 

m 

Lutto

 E' morta a Conflenti Gina Paola, conosciuta come Gina 'a Luca, Aveva 99 anni. Malata da tempo, non usciva più, ma ogni giorno la sua casa era meta di tanti conflentesi che nutrivano per lei un grande affetto.

Manteneva relazioni telefoniche con  tantissimi conflentesi emigrati in zone vicine e lontane: da Lamezia al Canada e in tutta Italia.  Aveva una mente lucidissima e, con diritto, poteva considerarsi la memoria storica del paese. Il cugino Corrado l'ha assistita amorevolmente  sino agli ultimi giorni. 

Condoglianze ai familiari. 

Messe fine anno

 

'U ragnu

 'U ragnu - nullu sadi quantu vale-

 0gn'unu sadi, mai avette scola,

nun usa fierri e no materiale

ma fravica 'na "casa " quannu vole.

 

Nun ha 'nu squatru, 'un sa de geometria;

Lavura citu citu; senza chiassu

Te fila 'nu filatu, foresia

Chi vale tantu quantu  l'oru stessu.

 

 A scienza usa 'stu filatu raru

Pppe ri strumenti de l'astronomia

E, curtivannu ragni, custa caru

 

ed ha provatu ca de ssa grossizza

lu filu de lu ragnu nun se spezza

supera ogni filu ppe fortizza. 

 

Dante Raso 

''A virdura

 Virde  'e culure edi la virdura

Ca d'intra edi chjina 'e clorofilla.

'E pampine 'e na troppa 'e camumilla

Su' bbirde  e te sana ra puntura... 

 

 A marva, ppe ra tussa è indicata;

Fa ssangu 'a cicoria, a re vene;

'A gente se la mangia ca cummene

Eppuru edi bbona ppe 'nsalata.

 

'U spinacciu  è 'nnu tonicu, sapiti;

Puru 'e sengre, 'e cardelle e re scarole.

Chi mangia assai capucciu mai nun more,

La sponza e caulu 'e jure su' squisiti.

 

De le virdure nente pue scartare;

Su' tutte virde, ma su' sapurite,

Eppuru ca nun fosseru squisite

Su' certu 'a megliu cosa ppe mmangiare.

 

'A lattuca  se po' mangiare cruda;

Miegliu ancore si tu la fai a 'nsalata

Ccu pocu sale e dd'uogliu n'adogliata  

E riminata fincu c'unu suda!

 

E mo, si fiermu, criju ch'aju dittu

Quantu volia dire e, ssi nun sbagliu,

Iu me scordava a ddire: virde è l'agliu

E fiermu ca n'addura stu miu scrittu!... 

 

Dante Raso 

 

  

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

, 

Feste

 Buon Natale a tutti.