'U surdatu

 Nu giuvane chi quannu jia a ra chiazza

Ognunu n'avantava ra spertizza, 

cchiu tardu lu vestieru de corazza

e, a ra guerra, soffria ppe ra lordizza! 

  S'avia crisciutu, longa, na varvazza

Ma na granata, 'ntruncu, de tunnizza

'na gamma cce truncau, mentre a re vrazza 

'na scaglia de granata li se 'mpizza. 

 

E ru nimicu, ccu na sciabulazza

le duna supra  a capu  e ru stennizza.

Mo, congedatu, è chinu 'e cuntentizza.

 

ppecchì 'u generale, ccu n'abbrazza

l'ha decoratu ppe tanta prodizza 

ca nullu fu capace mu l'ammazza. 

Dante Raso 

 

 Note: spertizza: intelligenza  lordizza:sporcizia

tunnizza; tonda 

 

 

 

 

 

 

 

 

 

m 

Lutto

 E' morta a Conflenti Gina Paola, conosciuta come Gina 'a Luca, Aveva 99 anni. Malata da tempo, non usciva più, ma ogni giorno la sua casa era meta di tanti conflentesi che nutrivano per lei un grande affetto.

Manteneva relazioni telefoniche con  tantissimi conflentesi emigrati in zone vicine e lontane: da Lamezia al Canada e in tutta Italia.  Aveva una mente lucidissima e, con diritto, poteva considerarsi la memoria storica del paese. Il cugino Corrado l'ha assistita amorevolmente  sino agli ultimi giorni. 

Condoglianze ai familiari. 

Messe fine anno

 

'U ragnu

 'U ragnu - nullu sadi quantu vale-

 0gn'unu sadi, mai avette scola,

nun usa fierri e no materiale

ma fravica 'na "casa " quannu vole.

 

Nun ha 'nu squatru, 'un sa de geometria;

Lavura citu citu; senza chiassu

Te fila 'nu filatu, foresia

Chi vale tantu quantu  l'oru stessu.

 

 A scienza usa 'stu filatu raru

Pppe ri strumenti de l'astronomia

E, curtivannu ragni, custa caru

 

ed ha provatu ca de ssa grossizza

lu filu de lu ragnu nun se spezza

supera ogni filu ppe fortizza. 

 

Dante Raso 

''A virdura

 Virde  'e culure edi la virdura

Ca d'intra edi chjina 'e clorofilla.

'E pampine 'e na troppa 'e camumilla

Su' bbirde  e te sana ra puntura... 

 

 A marva, ppe ra tussa è indicata;

Fa ssangu 'a cicoria, a re vene;

'A gente se la mangia ca cummene

Eppuru edi bbona ppe 'nsalata.

 

'U spinacciu  è 'nnu tonicu, sapiti;

Puru 'e sengre, 'e cardelle e re scarole.

Chi mangia assai capucciu mai nun more,

La sponza e caulu 'e jure su' squisiti.

 

De le virdure nente pue scartare;

Su' tutte virde, ma su' sapurite,

Eppuru ca nun fosseru squisite

Su' certu 'a megliu cosa ppe mmangiare.

 

'A lattuca  se po' mangiare cruda;

Miegliu ancore si tu la fai a 'nsalata

Ccu pocu sale e dd'uogliu n'adogliata  

E riminata fincu c'unu suda!

 

E mo, si fiermu, criju ch'aju dittu

Quantu volia dire e, ssi nun sbagliu,

Iu me scordava a ddire: virde è l'agliu

E fiermu ca n'addura stu miu scrittu!... 

 

Dante Raso 

 

  

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

, 

Feste

 Buon Natale a tutti.

'U gacciaru

 'Nu juornu,  gaccijava, nu gacciaru

A 'nu truncune 'e salice ciangente

Ca le 'mpacciava 'ntieri a 'nu spinaru

E, tagliannu, 'na spina assa pungente 

le se ficcau a nn'anca e, jestimannu, 

Tagliau tuttu 'u spinaru, gaccijannu! ...

 

 Stujannuse  lu sangu, ccu sta gaccia,

gaccija ru nnucente ruvettaru.

Ogni ggacciata 'na jestimaccia

 e ru muzzaudi tuttu paru paru.

Ppe nna pungiuta 'e spina 'u ruinau.

Ma gaccijatu, 'u salice 'un jatau!... 

 Dante Raso  

 

Note:  gacciaru: chi usa l'ascia o l'accetta. (boscaiolo, mastro d'ascia ecc). anca: gamba  stujannuse: asciugandosi

muzzare: tagliare 

Zucca di calabrese.

 'Na vota vuogliu scrivere 'na cosa

diversa d' 'e cose scritte prima;

la chiamo  poesia, ma quasi è prosa,

chi dice puocu o nente e mancu rima.

 

Vue forse tutti già ve l'aspettati

 de lejere 'na cosa supraffina:

ma, cari  miei letturi, vue  sbagliati;

cumu viditi, è fatta la quartina. 

 

me chiamu  Dante cumu l'Alighieri,

e su' gnurante. e  mancu me ricuordu

chillu chi me mangiavi l'autru ieri. 

 

perciò cari letturi, e mie lettrici,

ccu tuttu ca ve cuntu  ste picate,

iu sugnu certu ca restamu amici. 

 Dante Raso 

 

Note:

mancu: neanche  picate: cose di poco valore

 

 

 

'u stricaturu

 C'era na vota e puru mo ce sta

Nu stricaturu sutta a via suttana. 

Matina e sira a gente ce lavava

e se cuntava i fatti d'u paese.

Storie vecchie e nove, vere e nun vere 

accumpagnate d'u scrusciu d'a funtana. 

Donna Marietta è rimasta schetta 

pecchì 'und'avia a dota chi le spetta. 

 U frate, disgraziatu, se l'avia jocata 

ccu l'amici a re carte a na sirata. 

E mo le tocca fare a serva a ra canata 

e 'un tene mancu i sordi pe mangiare. 

Sta sempre dintra, sulu a ra ghiesa va

e tante vote se ferma  e se cumpessa

Dicenu ca... ma iu 'un ce cridu

su male lingue chi stanu a ricamare. 

U parracu se sa è fimminieri 

e fimmine ne tene   'nquantitate. 

Tutte quante sapimu ca se tene

a  Rosarina d'a  scinnuta d'u Piru. 

Chista 'un tene na lira, ma chissà cumu

cangia vesta e scarpe ogni simana.

E vue l'aviti vista a Maria Rosa

sta svergognata chi ccu don Nicola

se ferma tutt'e vote ppe parrare 

e certe sire 'u va puru a ru trovare. 

Dicenu ca 'ntonetta è n'atra vota prena

e mancu iddra sa chin'è ru patre. 

Giuseppina   d'u livitu

a ru maritu cce fa re corna

ccu tutta a gente chi capita a ra casa. 

E ra storia continua ppe' a jornata

ccu ru paise misu capusutta. 

 Antonio Coltellaro 

 

 

 

 

 

 

 

La sira de Natale

 La sira de Natale se mangiava

Le ziculie già tutte 'nzuccherate.

Mangiannu, chira notte 'nne 'nghjornava

 Ridiennu e ccuntannu chjiacchierate.

 

Ficu siccate e nnuci ccu ru vinu,

Grispelle de patate-  'e mele untate -

Li guanti, li turdilli; aviamu chjnu 

Lu stomacu 'e ste cose prelibate. 

Sazizza, ccu ru pane de castagna,

Lu suzzu ccu l'acitu veru finu.

Ova frische, venute d' 'a campagna,

E re verdure frische d' 'u giardinu.

 

Lu juornu nne prejavamu  'i rigali 

Chi a nnue avianu datu li parienti

 Mo sugnu viecchju e tuttu chinu 'e mali

 E, Natale, nun me vide a ri Cujjienti,

 

Dante Raso  ( Conflenti Sup. 1877 - Brooklyn 1977)

  

 Ziculie: leccornie  

 Mangiannu, chira notte 'nne 'nghjornava: si mangiava sino all'alba.

Ficu siccate: fichi secchi. 

e mele untate: cosparse di miele. sazizza; salsiccia  ova:uova

prejare: gioire.  suzzu: gelatina con pezzi cotti di maiale.

Chinu 'e mali: pieno di malattie. 

 Cujjienti: Conflenti

 

 .

'A farmacia

 Nu  juornu me servia 'na medicina

e a ra farmacia m'appi 'e junnare 

Fujiannu passu avanti 'na cantina 

duve tu truovi vivere e mangiare. 

 

'A farmacia te vinne re chianelle,

na medicina ppe ra cancarena; 

tagliole  ppe ri surici, pinzelle;

e tabaccu e bucchini d'amarena. 

 

Te vinne puru pannizzi ppe ra naca,

buttiglie ppe ru latte condenzatu; 

'a purga  ppe   'ncunu chi nun caca;

cuttune ppe ferite, arruotulatu. 

 

Rasuli e l'adduri ppe ru bagnu, 

'a carta ppe ru cessu e sapunetti,

e de ste cose è tantu lu guadagnu:

perciò chi vinne tutti chisti oggetti.

 

Fuorfici, scupettine e cicculata;

ppe fare sigarette l'equipaggiu.

Te vinne ra gazzosa assai gelata;

'mbuttitu lu paninu ccu formaggiu.

 

Lu farmacista ppe fare dinari

ha de vinnere tutte ste cose

ca sulu ccu re droghe ''un pò campari

vinniennu de chininu quattru dose.

 

 Dante Raso 

 

Note: m'appi 'e junnare: dovetti andare 

Fujiannu: scappando cantina: osteria

vivere e mangiare:  bere e mangiare 

cancarena: cancrena pinzelle: pinzette. 

naca: culla  adduri: profumi equipaggiu: tutto il necessario per...

pannizzi: pannolini  Chianelle: ciabatte

Scupettina: spazzola. 

Natale in poesia - Gianni Rodari e Umberto Saba.