venerdì 10 novembre 2017

A storia e san Martinu.

San Martinu, prima d'essere santu, era nu latru periculusu. Si ncuntrava ncunu, ce rubava i sordi e l'ammazzava. Un d'avia pietà pe nessunu.
Nu juornu passannu davanti na chiesiceddra ce veniu  a gulìa e trasire. Dintra c'era nu predicature.
S'assettau arrieti e se mintiu a sentire. U predicature dicìa:
Voliti bene a ru prossimu vuastru cumu  a vue stessi!  Chiddru chi un bue pe tie, un fare a l'autri.
Ripetiu ste parole tante vote  e  Martinu,  penzannu a tuttu u male ch'avia fattu,  se cumbertiu. 


Nesciu e si ne jiu a ra casa suprapenzieru.  A mugliere ogni vota ch'arrivava se spagnava, pecchì cominciava a gridare e si und'ubbidiscia subitu, certe vote a minava.
Stavota  quann'arrivau disse a ra mugliere; vo' bene a ru prossimu tue cume  a tie stessu! un fare a l'autri chiddru  chi un bue pe tie.
- O martì chi dici, un te capisciu!
Mbece e rispunnere u maritu ripetia sempre e stesse cose.
Allora pensau ca u maritu era diventatu pazzu. 
Pe ra verità se cumpurtava cumu n'uominu stranu. Mangiau, e pe tutta a sirata continuau a ripetere a stessa musica:
- Vo bene a l'autri,  cumu a tie stessu!
A notte Martinu un poze dormire.  Cume si u liettu fora diventatu nu spinaru. Penzava sempre a re parole d'u predicature e ogni tantu
dicia a ra mugliere: un fare a l'autri chiru ca un bue pe tie.
 A matina  i cumpagni briganti passaru priestu pe ru chiamare, quannu ancora und'era nchiaratu.
Cominciaru  a chiamare : oh Marti! Vattiru  a ra porta. Martinu i fice aspettare. Pue  s'affaciu a ra finestra. Paria tuttu sturdutu.
- Oh martì, manijati ca è tardu. 
Ma Martinu rispunniu:  Voliti bene a l'autri cumu a vue stessi!
- Oh Martì, chi dici ? si' diventatu scemu?
-Un fare all'autri chiddru ca un bue pe tie.
Ogni bota chi l'autri parravanu iddru rispunnia cu stu ritornellu.
A ra fine se stancaru e ce spararu.
Avimu dittu ca Martinu era nu brigante, perciò a mugliere  l'avia de cruovicare all'ammucciata.
Fice fare na fossa de l'amici briganti e ru fice cruovicare sutta na vutte.
A fimmina vinnia vinu e ogni juornu a gente venia  pe cumprare.
 Stranu ma a vutte restava sempre china. Vene oje, vene domani, a gente cominciau a parrare. U sapiu puru a legge. Vinieru i carbiniari e domandaru: cumu mai ste vutte un se spiccia mai?
A povera fimmina un sapia chi rispunnere. Allora i carbinieri
penzaru ca c'era nu mbruogliu. Scavaru vicinu a vutte e dopu tantu scavare trovaru a Martinu cu nu jure nmanu.
Martinu era nu scheletru, ma u jure era virde.
Allora disseru ch'era nu miraculu. U portaru a ra ghiesa e ce ficeru i funerali.
De tannu Martinu è diventatu santu e patrunu d'u vinu.

C'è nu dittu chi dice; a san Martinu , ogni mustu è binu. 
   ( Storia ripresa da racconti orali da A. Coltellaro)


1 commento:

Anonimo ha detto...

chista enna bona parabola .ammia piace lajire ste cose grazie ppe tanti ricuardi denu tiampu luntanu