Varrilari Cujjentari

ARU  VARRÌLE

Abbanunàtu, intru sse ragnatile

ppe furtuna né bbidi tu e nné ssìanti;

te guardu e ppìanzu, mio caru varrile,

a quannu tu venisti d’i Cuχχìanti.

« Chi vo’ bbarrili? » jìannu e rughe rughe

gridava chiru jùarnu u varrilàru.

Lucìanu i  circhi, jànche eranu e dùghe,

vacante e nùavu nùavu, t’accattàru!

S’era spunutu vicin’u sedile

sutt’a casa, propiu aru scanzaturu:

« Pigliate chissu, è ru mìagliu varrile

su’ ssordi beneditti. T’assicùru! »

Cum’ere bìaddu,  jàncu e nniatuu niattu,

ppe bbidire si daveru ere bbùanu

te minàru are dughe nu  zicchìattu.

Cumu nescìu  ssanìzzu chiru sùanu!

Pue me ricùardu ca d’u vuccularu

Te inchìaru d’ acqua e pùe cc’hanu juχχiàtu

chisà si mai nescìa ‘ncunu guttaru,

si tu d’ancuna parte ere grubbàtu!

Ma tuni, varrilìcchiu cuχχientaru,

sse prove tutte quante hai superatu

e de chiru tue granne vuccularu

pue  cce votàsti arrìadi tuttu u jàtu!

Doppu chi t’hanu fattu ssu pristìgnu

ccu ll’acqua, ara  funtana, te lavàru

ma nescìu gialla e ppue sapìa d’u lignu

a prima acqua  d’u tue vuccularu!

Pue, chinu ‘e acqua, prìastu te lassàmme,

ah ssu penzìaru! Sianti cumu vaca?

Supra due varr’e fìarru te curcàmme

cumu nu criaturu intru na naca!

Pàrica ‘u viju ancore chi s’appoggia

propiu vicinu ara porta d’u furnu

sutt’a finestra, d’a banna d’a loggia

supr’e varre, panzùtu e tunnu tunnu.

All’acquicédda sua currìmme tutti

jìa supra e sutta, povaruu varrile,

iddu però nu’ lassau mmai asciutti

cassalore, stanate e ru vacìle!

Parca era diventatu unu ‘e nue

e quannu inchia a pignata o a cassalora

scrusciava l’acqua e pàrca, a modu sue,

puru iddu volìa ddire na palora!

Quannu pue era bbacante, ara Valeria

mamma tornava e ru inchìa de nùavu

e supr’a capu pue, ppe ra miseria

parca cc’era ffermatu ccu nnu chiùavu!

Quantu vote nue inchimme e divacàmme

chiru varrile, io nu’ ssacciu dire

e quantu vote, cumu l’atre mamme,

jìu lesta mamma mia a ru inchìre!

Pàrica ‘a viju ancore mo’ chi trasa

se vascia e chianu u varrilicchiu spuna

para daveru a regina d’a casa

cà ‘n capu nu lle manca ra curuna!

Tutt’a na vota pue u prugressu vinne

intra ssu paisìaddu canciau tuttu,

scavàru a strata, chiantàru sse ntinne

e ru varrile mio restàu asciuttu!

E ru prugressu n’ha canciatu a vita

cà tuttu nue  volimu ‘mparu ‘mparu,

l’acqua scinna girannu a margherita.

A cchi ne serva cchiù  ssu vuccularu?

Acqua tu nu’ nn’hai cchiù, mancu aru sìattu.

Pìanzu aru bene chi tu n’ha’ volutu

te volerra minare nu zicchìattu,

ma sugnu certu ca  restèrre mutu!

Caru varrile, chissu è n’atru munnu,

ddue  ‘u  sservanu varrili nné curune

si vue mu vena tuttu vrunnu vrunnu

basta ssulu mu munci nu buttune!

Cum’ere ciota oi mammarédda mia

quannu ti nne jìe ad ìnchiare u varrile

ppe cucinare e ppe ra pulizzia!

Ssu munnu moni diventàu civile!

Cchi munnu bìaddu, o cchi Paradisu

sunu passati chiri jùarni amari,

‘n capu cchiù nu’ sse porta nuddu pisu

ppe lavare  i piatti e ri cucchiari!

Intra sse rughe ‘un dìcia cchiu ari gìanti

u varrilaru ccu i modi sue gentili:

« Arrivàu u varrilaru d’i Cuχχianti!

Venìtiv’accattare ssi varrili!»

I tìampi e ri ciarvìaddi mo’ canciàru

ma si mancanu u gassu e ra corrente,

sta’ certu, o mio varrile Cuχχientaru,

nu’ ssimu cchiù capaci ‘e fare nente!

Perciò, guagliuni mie, stamunne attìanti

Cà si rumpìmu ssi tubi e ssi fili,

chisà si pue trovamu ari Cuχχianti

chi ne sa ffare ancore ssi varrili!

  Gaspare Caputo (Martirano Lombardo)