domenica 10 agosto 2014

Quannu te dice


Quannu te dice, 'nto', torna a ra casa!
mo su' tant'anni ca 'un tuorni chiù.
Vene ca n'assettamu cà a na rasa
e ragiunamu d'u tiempu chi un c'è chiù.

Te cuntu, de quann'ere nu guagliune
e te portava, mbrazza, a fatigare
d'u juornu chi cadisti a ru cavune
e pe na notte t'avia de cunzulare.


A bote, quannu u suonnu 'un me piglia,
e pe ra verità 'un duormu quasi mai,
pienzu e ripienzu a tutta sta famiglia
quannu a ra casa c'era nu via vai.

Sette figli cu tie aju crisciuti
e a unu a unu vinne siti juti
pe ru munnu ve siti sparpagliati
e a ra casa 'un siti mai tornati.

Passa ru juornu, njorna, torna scura
vene ru viernu, sinne va a stagione
vola ru tiempu, un sacciu quantu dura;
me pare cumu fosse a na prigione.

Vene ca te cuntu de cumu stu paise
edi cangiatu de quannu l'hai lassatu:
a terra è margia, e case sunu chiuse
nente è rimastu cum'era a ru passatu.

Chi tiempi, nto'! e quanta gente c'era!
ogni bota chi nescìe paria na fera.
Mo, si vai du paise supranu a ru suttanu
pe ra strada un vidi mancu nu cristianu.

vene quannu te dice, un t'appricare!
tieni famiglia ed hai e fatigare
però ricorditila, nto', sta cosa
oje ce sugnu, domani chine 'u sa!

                                                            Antonio Coltellaro






1 commento:

Anonimo ha detto...

nto iu te criju ,ca iu cce sugnu passatu .ca nue eramu dece,e nnamu sparpagliatu chine a levante e chine a ponente e nunciamu mai ricogliuti nsieme intra na stanza penne godire nu muarza e pane tutti nsieme ..aju lejutu a poisia tu nu chiantu maju fattu penzannu a chiddi juarni quannu nue eramu guagliuni sutta e riventinu ,ca mo e luntanu e mmo chine te sente simu luntani .u core certe vote sembra ca te lassa ru piattu te giri e te vuaiti ma nunce nessunu mamma u nce sta cchiu ppe te cunsula,e mu te dice figliuma tutte e cose vanu bone e Diu pruvvide. chistannu facimu u vutu ara Madonna munne fa sta grazia penne fa ricogliere nsiene natra vata,suanu tutte cose passate .??