Era giuvane e beddra e tu quatraru
a sira chi ccu ttie minne scappai
'na simana e fuacu 'a nu pagliaru
cussì cuntenta 'un sugnu stata mai.
Ma sulu d'amure 'un se pò campare
passata a festa c'era 'e fatigare
tu a zappare, iu a jire a ra jornata
ppe nu muorzu de pane e 'na patata.
era 'na vita china d'affrittienza
pane e cipuddra, a sira e ra matina
e dopu n'annu, penza e pue ripenza
te si' decisu 'e jire a r'Argentina.
m'hai dittu: vaju nu paru d'anni,
me fazzu i sordi e a ra casa tuornu
e m'hai lassatu ccu nanni e catananni
e ccu na figlia de nu sulu juornu.
De anni ne su passati cchiù de nove
e a figliata u piettu già se move
a robba è tutta quanta nu spinaru
e ogni juornu ppe mie è sempre amaru
Vienitinne Miché, vienitinne
vienitinne e toccame ste minne
e diceme c'ancora me vue bbene!
'un me lassare cchiù intra ste pene!
Ccu sulu amure, 'un se pò campare
ma si te manca, se pò puru crepare
megliu 'nu muorzu 'e pane 'ncumpagnia
ca carne e vinu sula mienzu a via.
A. Coltellaro
Nessun commento:
Posta un commento